វត្តមួយកៀកភ្នំពេញ មានស្រះទឹកដ៏ធំ អាចជិះកាយ៉ាក ទាទឹកកម្សាន្ត មើលទេសភាពជុំវិញ ស្អាតក្រៃ

មហាជននៅក្នុងបណ្ដាញសង្គម ផ្ទុះការចាប់អារម្មណ៍ជាខ្លាំង ដែលកន្លងមកកម្រឃើញមានកន្លែងកម្សាន្តនៅក្នុងទីអារាមឡើយ តែពេលនេះ មានកន្លែងលម្ហែមួយ ស្ថិតនៅក្នុងបរិវេណទីអារាមតែម្ដង ដែលនៅទីនោះ មានវាលទឹកដ៏ធំ អាចឱ្យប្រិយមិត្តទៅលម្ហែកម្សាន្ត ពេលទំនេរពីការងារ ក៏ដូចជាការសិក្សាផងដែរ។

ស្ថិតភូមិអង្គរជ័យ ឃុំបន្ទាយដែក ស្រុកកៀនស្វាយ ខេត្តកណ្ដាល កន្លែងលម្ហែ ដែលមានចំងាយមិនឆ្ងាយប៉ុន្មានពីរាជធានីភ្នំពេញនោះ ត្រូវបានគេហៅជាទូទៅថា វត្តអង្គរជ័យ ដោយសារតែវាស្ថិតនៅក្នុង បរិវេណវត្តនេះតែម្ដង។ នៅទីនោះ ប្រិយមិត្តអាចអង្គុយលម្ហែនៅលើកញ្ចុះបណ្ដែតទឹក និង អាចទទួលទានអាហារនៅលើនោះបានផងដែរ។

អ្វីដែលកាន់តែពិសេសទៀតនោះ កន្លែងលម្ហែអារម្មណ៍ ដែលស្ថិតក្នុងវត្តអង្គរជ័យនេះ មានផ្ទៃទឹកដ៏ធំល្វឹងល្វើយ ជាមួយនឹងកាយ៉ាក និង ទាទឹកជាច្រើនក្បាល អាចឱ្យប្រិយមិត្តជិះលម្ហែកម្សាន្តអារម្មណ៍ និង ថតរូបទុកជាអនុស្សាវរីយ៍បានផងដែរ។

លើសពីនេះ អ្នកដំណើរក៏អាចអង្គុយលេង ដោយនៅចាំអង្គុយមើល ថ្ងៃលិចនាមាត់ទឹកដ៏សែនមនោរម្យផងដែរ ដោយពុំព្រួយខ្លាចមេឃងងឹត ធ្វើដំណើរផ្លូវឆ្ងាយឡើយ ព្រោះវាមានទីតាំងនៅកៀកនឹងរាជធានីភ្នំពេញប៉ុណ្ណោះ៕ រូបភាពដោយ ៖ រាមភូមិ, អត្ថបទដោយ​៖ Muyly (Popular Magazine)

Related posts

Leave a Comment